Interyer dizaynidagi 10 ta eng dahshatli xato

Kvartira dizayni ko'plab omillarga bog'liq va individual tarzda shakllanadi. Biroq, eng yaxshi g'oyalarni ham barbod qiladigan eng keng tarqalgan xatolar mavjud. Interyeringiz yanada mukammal bo'lishi uchun ularni o'rganib chiqing.

Yagona uslubning yo'qligi

Xonalarda turlicha pardozlash materiallaridan foydalanish yoki bir kvartiraning o'zida bir necha xil pol qoplamasini ishlatish — yomon g'oya. Uyni zonalarga ajrating. Masalan, yotoqxona, bolalar xonasi va umumiy maydon (mehmonxona va dahliz). Oxirgi qismda devorlar bir xil rangda bo'yalishi yoki bir xil turdagi oboylar bilan qoplanishi kerak. Bu kafelga ham tegishli. Hammom, oshxonaning ishchi zonasi va dahlizdagi kafel ham bir xil bo'lishi lozim.

Arzon pardozlash

Keraksiz soxtaliklardan saqlaning: foto-oboylar, tosh yoki tabiiy yog'och imitatsiyasi, gipsokarton. Umumiy ko'rinishni buzishi mumkin bo'lgan detallarni tejash ham yaramaydi. Gap plintuslar, eshik tutqichlari va o'chirgichlar (viklyuchatellar) haqida bormoqda.

Proportsiyalarning buzilishi

Dekor uchun proportsiyalar juda muhim. Katta xonada faqat katta buyumlar bo'lishi shart emas. Biroq, kichkina xonada mini-divan va ulkan jurnal stoli o'rinsiz ko'rinadi. Proportsiyalarni aralashtirishga faqat xona maydoni imkon bersagina ruxsat etiladi. Agar joyingiz cheklangan bo'lsa, uyg'un interyer yaratishga yordam beradigan buyumlardan foydalaning.

Noto'g'ri yoritish

Kvartiralarda eng keng tarqalgan yoritish varianti — xona o'rtasidagi yolg'iz lyustra. Bu zamonaviy emas va eng yomoni, amaliy ham emas. Yorug'lik manbalari ko'p bo'lishi va ular turli zonalarga xizmat qilishi kerak. Masalan, oshxonadagi ishchi zona ustida sofitlar, ovqatlanish stoli ustida esa lampalar bo'lishi kerak. Yotoqxonada esa yorug'lik karavot yonida, garderob va ko'zgu oldida bo'lishi lozim.

Rozetka va o'chirgichlar muammosi

Ko'pgina interyerlarda rozetkalar sonining kamligi va o'chirgichlarning noto'g'ri joylashuvi kuzatiladi. Kvartirangizda tarmoqqa ulanishi kerak bo'lgan qancha elektr jihozlari borligini o'ylab ko'ring. Oshxonada bu muzlatgich, duxovka, idish yuvish mashinasi, mikroto'lqinli pech. Hatto hammomda ham kamida ikkita rozetka bo'lishi kerak: kir yuvish mashinasi uchun va, masalan, fen yoki elektr ustara uchun.

O'chirgichlarga kelsak, avvalo mebel qayerda turishini va eshiklar qaysi tomonga ochilishini hal qilib oling.