Avstraliyalik Italiyadan bir yevroga hashamatli uy sotib oldi

Ko'chmas mulk narxi bunchalik arzon bo'lgan shahardan ufqda Etna vulqoni ko'rinib turadigan panoramali manzara ochiladi.

Avstraliyaning Adelaida shahridan bo'lgan 32 yoshli tibbiyot xodimi Mark Kopun Sitsiliyaning Mussomeli shaharchasidan tarixiy bino sotib oldi. Uning o'zi aytib berganidek, hashamatli uy unga bir finjon espresso narxiga, ya'ni bir yevroga tushgan.

— Do'stim bir necha oy oldin internetda ko'rgan bu hayratlanarli, aql bovar qilmaydigan yangilik bilan menga qo'ng'iroq qildi. Mussomelida shunchalik ko'p binolar deyarli tekinga tarqatilayotgan edi, men kutib tura olmadim. Men shahar hokimiyati bilan bog'landim va Sitsiliyaga birinchi samolyotga o'tirib uchib ketdim, — deydi Kopun.

2017-yil oxiridagi ma'lumotlarga ko'ra, Mussomeli shahrida 11 mingdan kam aholi istiqomat qiladi va yoshlarning yirik shaharlarga ko'chib ketishi sababli aholi punkti har yili bo'shab bormoqda.

Avvalroq Life xabar berganidek, shahar hokimiyati 500 dan kam bo'lmagan uyni 1 yevrodan bozorga chiqargan. Hozircha faqat 100 ta binoga xaridor topilgan. Biroq, bitimning "yashirin tomoni" shundaki, ko'chmas mulkning yangi egasi binoni ta'mirlashi kerak bo'ladi.

Kopunga tarixiy markazning tor ko'chalari labirintida joylashgan uch qavatli uy nasib etdi. Uning omadi keldi, chunki bino sotuvga qo'yilgan boshqalarga qaraganda yaxshiroq saqlanib qolgan. Erkak ta'mirlash ishlarining katta qismini mustaqil ravishda amalga oshirmoqchi.

XVIII asr o'rtalariga oid binoni ta'mirlash ishlariga erkak jami 20 ming yevrodan ko'p bo'lmagan mablag' sarflashni rejalashtirmoqda. Bularga devorlarni bo'yash, derazalarni almashtirish va hammomlarni ta'mirlash kiradi. Shunday qilib, 20 001 yevro evaziga erkak ikkita ko'chaga chiqish imkoniga ega, bir nechta balkonli, garajli va derazadan ajoyib manzarali 200 kvadrat metrli turar joyga ega bo'ladi.

Manba: life.ru