Katta xarajatlar. Ta'mirlash ishlarida qanday xatolarga yo'l qo'yamiz?

Yoz — ta’mirlash ishlari uchun ayni muddao. Ammo ta’mirlash — qimmatga tushadigan ish, ayniqsa, unga oldindan tayyorgarlik ko’rmasangiz va katta mablag’ni tejab qolishga yordam beradigan mayda-chuyda narsalarni unutib qo’ysangiz.

 

Uy-joyni yangilash jarayonida ortiqcha xarajat qilmaslik uchun qanday xatolardan qochish kerak:

 

 

Mamlakatimizda qurilish ishlarining eng qizg’in pallasi issiq mavsumga to’g’ri keladi. Albatta, bu odatiy hol va qulayroq ham. Ammo bu qulaylikning ikkinchi tomoni bor — hamma narsaning narxi oshib ketadi: pardozlash materiallaridan tortib, ta’mirlash brigadalari xizmatlarigacha. Bundan tashqari, talab yuqori bo’lgani uchun yaxshi quruvchilarni topish qiyinroq. Agar topgan taqdiringizda ham, siz yagona mijoz bo’lishingizga kafolat yo’q: brigadalar daromad olish imkoniyatini qo’ldan boy bermaydi, lekin hamma vaqt ham ulgurishmaydi. Bu siz uchun uy topshirilishining kechikishiga olib keladi. Ha, bu yana yozda qurilish do’konlaridan tovarlar yetkazib berilishini uzoqroq kutishga to’g’ri kelishi sababli ham cho’ziladi.

 

Imkon qadar ta’mirlash ishlarini bahor yoki kuzda bajaring: tezroq tugatasiz va pulingizni tejaysiz.

 

 

Oldindan xarajatlarni hisoblab chiqmasdan ta’mirlashni boshlamaslik kerak, buni har qanday tajribali quruvchi aytadi. Aks holda, byudjet yetmay qolishi va uy-joyni yangilash cheksiz muddatga cho’zilib ketishi xavfi katta.

 

Qurilish bozoriga borishdan oldin, ta’mirlash qancha turishini taxminiy hisoblab chiqing. Bunda brigadir yordamiga murojaat qilgan ma’qul: u ta’mirlash kerak bo’lgan xonaning kvadraturasini hisoblab, qancha qurilish va pardozlash materiallari kerakligini chamalab beradi. Shundan so’nggina bozorga borib, oboy, parket va plitkalar narxlari bilan tanishishingiz mumkin.

 

Yakuniy summaning 30-40 foizini qo’shimcha qilib qo’shib qo’ying: shunda materiallar qimmatlashib ketsa yoki ta’mirlash jarayonida rejalaringiz o’zgarib, mahalliy yashil plitka o’rniga italyancha ko’k plitka yotqizmoqchi bo’lsangiz, o’zingizni sug’urtalagan bo’lasiz.

 

 

Ta’mirlash vaqtida rejalarning tez-tez o’zgarishi byudjetga sig’maydigan qo’shimcha katta xarajatlarga olib kelishi mumkin. Avvaliga oddiy vanna o’rnatishni rejalashtirgandingiz, lekin hayotda bir marta yashaymiz: chet elniki va albatta gidromassajlisi bo’lishi kerak. Narxdagi farq — o’n minglab rublni tashkil qiladi. Agar bunday pul bo’lmasa (agar siz qimmatroq tovarlar foydasiga rejalarni bir necha bor o’zgartirishga moyil bo’lsangiz, demak, pul katta ehtimol bilan yo’q), qarz olishga to’g’ri keladi. Bu esa foizlar uchun qo’shimcha xarajat degani.

 

Oddiy shift o’rniga tarang shift (natyajnoy potolok), flizelin oboy o’rniga matoli oboy, oddiy cho’yan vanna o’rniga gidromassajli vanna tanlash va buning uchun kredit olishdan oldin, buning uchun ikki barobar ko’p pul to’lashga tayyormisiz, yaxshilab o’ylab ko’ring.

 

 

Pardozlash materiallarining aniq miqdorini — santimetrgacha — hisoblashning iloji yo’q. Gap shundaki, ta’mirlash jarayonida bir-ikki plitka sinishi yoki bir nechta oboy varag’i ifloslanishi mumkin.

 

Do’konma-do’kon yugurib vaqt yo’qotmaslik (aytgancha, u yerda kerakli plitka yoki oboy qolmagan bo’lishi ham mumkin) va yetkazib berish uchun ortiqcha pul sarflamaslik uchun materiallarni ozgina zaxira bilan sotib olish tavsiya etiladi. Aytgancha, ba’zi qurilish gipermarketlarida ishlatilmagan tovarlarni qaytarish imkoniyati mavjud (asosiysi, chekni tashlab yubormang).

 

 

Bir tomondan, pardozlash materiallarini ixtisoslashgan do’konlardan sotib olish qulay: plitkani — plitka do’konidan, laminatni — pol qoplamalari do’konidan. Boshqa tomondan, bunday amaliyot yetkazib berish uchun katta mablag’ sarflashga olib keladi.

 

Eng yaxshisi, ta’mirlash uchun tovarlarni bitta katta do’kondan sotib olish kerak. Buning uchun bir kun vaqtingiz ketadi, lekin barcha masalalarni bir yo’la hal qilasiz. Yetkazib berish uchun bir marta haq to’laysiz. Balki, yirik xarid uchun chegirma ham olarman.

 

 

Boshqa tomondan, ta’mirlash vaqtida hamma narsani tejashga urinmaslik kerak. Shunday narsalar borki, ularga keyinchalik qayta-qayta ta’mirlash yoki almashtirishdan ko’ra, bir marta munosib summa to’lagan ma’qul. Masalan, santexnika. Va ha, arzon quruvchilar xizmatidan foydalanmaslik ham yaxshiroq: ularning xatolarini tuzatish qimmatroqqa tushadi.

 

 

Aytgancha, quruvchilar haqida. Ko’pincha fuqarolar qoralama pardozlash materiallarini sotib olishni brigadirga ishonib topshirishadi. Oxir-oqibat, bu oboy emas, quruvchilar qaysi shpatlyovka yaxshiroq va qancha kerakligini yaxshiroq bilishadi. Sobiq bo’yoqchi Svetlana S. aytib berganidek, brigadirlar buyurtmachilarning ishonuvchanligidan foydalanib, ikki, hatto uchta kvartirani ta’mirlashga yetadigan qoralama materiallar hajmini aytishadi. Narxdagi farqni esa cho’ntaklariga urishadi.

 

«Qurilish bozoridagi cheklarga ishonmaslik kerak: ular „soxta“ bo’lishi mumkin. Ta’mirlash bilan jiddiy shug’ullanadigan brigadalarning bozorlarda o’z odamlari bor, ular istalgan summaga chek yozib berishlari mumkin. Qoralama materiallar uchun haqiqiy xarajatlar va ta’mirchilar cho’ntagiga urgan summa o’rtasidagi farq o’n minglab rublga yetishi mumkin.

 

Hatto o’z brigadangizga faqat yirik tarmoq do’konlaridan xarid qilishni buyursangiz ham, ular sizni baribir aldashlari mumkin: oldindan oshirilgan materiallar hajmini belgilashadi, so’ngra ortiqcha qopdagi pol qorishmalari va betonokontaktni o’z tanishlariga qurilish bozorida yarim narxiga sotib yuborishadi», — deydi Svetlana.