Diqqat, firibgarlar: ikkilamchi bozorda sotuvdagi ommabop sxemalar

"Inkom-Nedvijimost" kompaniyasi vakili Mixail Kulikov ikkilamchi ko‘chmas mulk sotuvchilari tezroq pul ishlash uchun foydalanadigan 3 ta mashhur firibgarlik sxemasini oshkor qildi...

Past narx

Bu juda eski hiyla: sotuvchilar uy-joyni arzon narxda qo‘yishadi, ammo oxirgi daqiqada narxni oshirishadi. Bunday vaziyatga tushib qolmaslik uchun kelishuvlarni oldindan tuzilgan shartnomada qayd etish maqsadga muvofiqdir. U yerga mulk egasi bilan muhokama qilgan holda bo‘nak (zadatok) miqdori haqidagi bandni ham kiritish kerak. Oddiy hujjat har ikki tomonning xavfini kamaytiradi. Agar sotuvchi belgilangan shartlar asosida bitimdan voz kechmoqchi bo‘lsa, u xaridorga bo‘nakni ikki barobar miqdorda qaytarishi kerak bo‘ladi. Agar xaridor fikridan qaytsa, u bo‘nakni yo‘qotadi.

Hujjatlar bilan bog‘liq firibgarliklar

Firibgarlikning yana bir turi – ko‘chmas mulkni uning egasi nomidan uchinchi shaxslar tomonidan sotish. Bu mulk egasi xorijga ketgan yoki shunchaki uyini ijaraga bergan hollarda yuz berishi mumkin, firibgarlar esa soxta pasport yoki hujjatlar tayyorlashadi. Eng yomoni shundaki, firibgarlar hujjat tayyorlash texnologiyalarini doimiy ravishda takomillashtirib borishmoqda, shuning uchun suv belgilari (vodyanoy znak) xavfsizlikning 100% kafolati bo‘la olmaydi. Bitimga tayyorgarlik ko‘rishda rieltorlar mulk egasining shaxsini aniqlash uchun barcha mavjud usullardan foydalanishlari kerak. Masalan, qandaydir bahona bilan sotuvchidan bo‘lajak xaridorlarni qo‘shnilar bilan tanishtirishni so‘rash mumkin, ular mulk egasi u yerda uzoq vaqt yashayotganini tasdiqlashlari mumkin.

Muqobil bitimlar

Bu firibgarlik sxemasi bo‘lmasa-da, xaridorlar uchun unchalik foydali emas. Gap bitim rasmiylashtirilgunga qadar kvartiradan ro‘yxatdan chiqmaydigan mulkdorlar haqida bormoqda. Ular buni boshqa ko‘chmas mulk sotib olayotgani va hozircha hujjatlarni tayyorlayotgani bilan izohlashlari mumkin.

Amaliyotda bunday holatlar uchrab turadi, ammo sobiq egalarining ro‘yxatdan o‘tish haqidagi savollarga noaniq javob berishi yoki umuman javobdan qochishi xaridorlarni ogohlantirishi kerak. Bunday hollarda, uyda ro‘yxatda turgan odamlar bilan ko‘chmas mulk sotib olgandan ko‘ra, xarid qilishdan voz kechish oqilona bo‘ladi.

Sobiq mulkdorlar bitimdan keyin ham kvartiradan chiqib ketishga shoshilmaydigan holatlar tez-tez uchraydi, garchi ular buni qiyin hayotiy vaziyatlar bilan izohlasalar ham. Shu sababli ular ro‘yxatdan chiqishga ham shoshilmasliklari mumkin. Albatta, sud jarayonidan so‘ng ularni katta ehtimol bilan chiqarib yuborishadi, ammo ishni ko‘rib chiqish noma’lum muddatga cho‘zilishi mumkin, ayniqsa, gap bolalar, keksalar, nogironlar va boshqalar haqida ketganda. Aynan shuning uchun rieltor bitimni rasmiylashtirishdan oldin ishtirokchilarning ro‘yxatdan o‘tganlik holatiga e’tiborliroq bo‘lishi kerak.

Manba: https://superrielt.ru