Ikki qavatli uy loyihasi: tipik xatolar

Ochiq rejalashtirilgan va ta'mirlanmagan hovli uyini sotib olayotganda, eng birinchi qiladigan ishingiz bu — makonni to'g'ri rejalashtirishdir.

Bunga ko'p vaqt sarflashga to'g'ri keladi. Ammo keyinchalik biron bir funksional zonaning yo'qligi yoki keraksiz, foydasiz burchaklar mavjudligidan afsuslanmaysiz. Ko'plab rejalashtirish loyihalari va hovli uylari egalarining fikrlarini tahlil qilish muayyan qonuniyatlarni shakllantirishga imkon beradi.

Buyumlarni saqlash

Uyda saqlash tizimini tashkil etish kvartiradagidan tubdan farq qiladi, chunki uy ikki qavatli bo'ladi. Agar dastlab bir qavatdan ikkinchisiga o'tishda hech qanday qiyinchilik yo'qdek tuyulsa, bu yanglish fikr. Agar oilangiz bo'lsa, bir kun ichida juda ko'p marta zinadan chiqib-tushishingizga to'g'ri keladi. Bu foydali tuyulishi mumkin, ammo umumiy hisobda u juda ko'p vaqtingizni oladi. Natijada, buyumlarning bir qismi intuitiv ravishda qulayroq joylarga yig'ila boshlaydi. Oqibatda esa — sizni asabiylashtiradigan tartibsizlik yuzaga keladi.

Kundalik mavsumiy va ko'cha kiyimlari uchun birinchi qavatda garderob ajratish yaxshiroqdir. Uni kirish qismi yaqiniga joylashtirgan ma'qul, shunda uyning narigi chekkasiga yugurib o'tirmaysiz.

Ikkinchi qavatdagi yotoqxonalarda esa choyshablar, yostiq jildlari, qolgan kiyimlar va mavsumiy bo'lmagan buyumlarni saqlash mumkin. Masalan, agar tashqarida qish bo'lsa, yozgi poyabzallarni pastki qavatdagi garderobda saqlashning ma'nosi yo'q.

Uy va yosh bolalar

Birinchi qavatda albatta bolalar uchun zona bo'lishi kerak. Siz uy yumushlari va ikkinchi qavatdagi bolaning yig'isi o'rtasida sarson bo'lib, zinaga to'siq qo'yganmisiz yoki yo'q deb o'ylab, doimiy ravishda ikkinchi qavatga yugura olmaysiz.

Kommunikatsiya chiqishlarini uyga kirish nuqtalaridan uzoqda joylashtirish

Agar kommunikatsiya tizimi uyga kirish qismida nazarda tutilgan bo'lsa, oshxona yoki sanuzelni uyning boshqa chekkasida joylashtirish muammoli bo'ladi. Albatta, agar siz uch metrli shift egasi bo'lmasangiz.

Kir yuvish mashinasining drenaj nuqtasi oqova suv chiqish nuqtasidan balandroq bo'lishi kerak.

Agar siz sanuzelni uyning boshqa chekkasida joylashtirmoqchi bo'lsangiz, pol qoplamasi (styajka) balandligini oshirish haqida qayg'urishingiz kerak bo'ladi. Bu esa o'z navbatida shift balandligining pasayishiga olib keladi. Agar bunga imkoningiz bo'lsa, xavotirga o'rin yo'q. Aks holda, mavjud holatdan kelib chiqib, funksional zonalarni kommunikatsiya chiqish nuqtalariga yaqinroq rejalashtirish kerak.