Nima uchun investorlarni Gretsiya ko'chmas mulki o'ziga jalb qiladi?

Tahlilchilarning fikricha, Afinadagi uy-joyga sarmoya kiritish London, Berlin yoki Parijga qaraganda foydaliroq. Qaysi ko'rsatkichlar Gretsiya foydasiga gapiradi?

Statistikaga ko'ra, xorijdagi turar-joy ko'chmas mulkiga investitsiya kiritishning o'rtacha muddati taxminan besh yilni tashkil etadi va bunday uzoq muddatli investitsiyalar yaxshilab hisoblab chiqilishi kerak. Tahlil qilish uchun eng murakkab mavzulardan biri — bozor qizib ketganmi va unda kelgusi muammolar belgilari bormi, degan savoldir. Bu yerda mutaxassislar birinchi navbatda uchta jihatni baholashni taklif qilishadi: ko'chmas mulk aholi uchun qanchalik qulay, odamlar uchun uy sotib olish foydalimi va ijara daromadini olish imkoniyati bormi.

Masalan, hozirgi Yevropa tendensiyalaridan biri — Gretsiyaga sarmoya kiritishdir. Nordea ma'lumotlariga ko'ra, mamlakatdagi turar-joy ko'chmas mulkiga kiritilgan yillik xorijiy investitsiyalarning 80 foizigacha qismi yevro hududidan to'g'ridan-to'g'ri kelib tushadi. Xususan, turizm tufayli qisqa muddatli ijara bozori har yili 25 foizga o'sib, ko'chmas mulk egalariga taxminan 2 milliard yevro daromad keltirmoqda va hukumat soliqlarni, shu jumladan ko'chmas mulk solig'ini ham kamaytirmoqda. Xalqaro ko'chmas mulk brokeri Tranio boshqaruvchi hamkori Georgiy Kachmazov yana bir muhim ko'rsatkich haqida gapiradi.

«Biz xorijiy investitsiyalar haqida gapirganda, mahalliy aholi daromadlari va kvadrat metr narxining nisbatiga qaraymiz. Masalan, Afinada mahalliy ish haqi va kvadrat metr narxining nisbati shundayki, inson bu kvartirani o'zining o'n yillik maoshi evaziga sotib olishi mumkin. London yoki Berlinda esa — 20 yillik maoshi evaziga. Mahalliy aholining kvartira sotib olish imkoniyati — bu investor xavfsizligining bir poydevoridir. Mahalliy aholi har doim narx belgilash uchun asos bo'lib xizmat qiladi».

Gretsiya foydasiga yana bir dalil — price to rent (narx va ijara) indeksi. Tranio ma'lumotlariga ko'ra, Afinada bu ko'rsatkich shahar markazi uchun 20,2 ni, chekka hududlar uchun esa 23,9 ni tashkil qiladi. Ya'ni, Afina markazida kvartira sotib olib, uni ijaraga bergan investor uning qiymatini 20 yilda, chekka hududda esa 24 yilda qoplab olishi mumkin. Taqqoslash uchun, Londonda markaziy price to rent indeksi taxminan 34, Parijda 39, Berlinda esa 30 ni tashkil etadi. Price to rent qanchalik yuqori bo'lsa, ko'chmas mulkni qayta sotish shunchalik qiyin bo'ladi. Bu amaliyotda isbotlangan.

Manba: bfm.ru