Nima uchun cho'ziluvchan shiftlar osilib qoladi yoki asosiga "yopishib" qoladi?

Osma shiftlar tayyor konstruksiya elementlaridan o‘rnatiladi, ularni o‘rnatgandan so‘ng bo‘yash shart emas. Agar montaj texnologiyasi va foydalanish qoidalariga to‘g‘ri rioya qilinsa, bunday qoplama o‘nlab yillar davomida xizmat qilishi mumkin.

Nima uchun cho‘ziluvchan (natyajnoy) shiftlar osilib qoladi?

Xonani notekis isitish natijasida mato deformatsiyalanishi mumkin. Xonadagi haroratning keskin o‘zgarishi shiftlararo bo‘shliqda ortiqcha yoki yetarli bo‘lmagan bosimni keltirib chiqarishi mumkin, shu sababli mato osilib qolishi mumkin. Shu bois mutaxassislar pardozlashning ushbu turini tanlashda xonadagi minimal havo haroratini hisobga olishni va keskin o‘zgarishlarga yo‘l qo‘ymaslikni maslahat berishadi.

Shuningdek, ishlab chiqarishdagi qisqarish yoki noto‘g‘ri montaj bilan bog‘liq bir qator sabablarga ko‘ra ham cho‘ziluvchan shiftlar osilib qolishi mumkin. «Agar yangi shift eski o‘lchamda qilinsa, taranglik bo‘lmaydi. Cho‘ziluvchan shift uchun mato har doim kichikroq qilib tayyorlanadi, uni tor kabi tarang tortish kerak. Cho‘ziluvchan shift asosiy shift yuzasidagi yoriqlar tufayli ham osilib qolishi mumkin. Eshik yoki derazani ochib-yopganda u yerga havo kiradi. Ya’ni, matoning osilib qolishiga bir nechta omillar sabab bo‘lishi mumkin», — deydi cho‘ziluvchan shiftlar ishlab chiqaruvchi yirik kompaniyaning savdo bo‘limi rahbari Denis Runtov.

Agar cho‘ziluvchan shift osilib qolsa, nima qilish kerak?

Agar shift namlik va harorat o‘zgarishi ta’sirida deformatsiyalangan bo‘lsa, uni butunlay qismlarga ajratib, kerak bo‘lsa, ba’zi elementlarini qirqib, qaytadan yig‘ish talab etiladi. Mutaxassisning so‘zlariga ko‘ra, cho‘ziluvchan shiftni yechishda karkas mahkamlagichlariga e’tibor berish kerak, ehtimol, osilib qolish zaif mahkamlash tufayli yuzaga kelgan bo‘lishi mumkin. Agar muammo asosiy shift yuzasidagi yoriqlarda bo‘lsa, demak, ularni bartaraf etish muhim.

Nima uchun cho‘ziluvchan shiftlar asosiy shiftga «yopishib» qoladi va bu holatda nima qilish kerak?

Cho‘ziluvchan shiftlar ikki sababga ko‘ra (asosiy shiftga «tortilib») «yopishib» qolishi mumkin: germetiklikning yo‘qolishi va noto‘g‘ri montaj natijasida. Agar muammo o‘rnatilgandan deyarli darhol yuzaga kelgan bo‘lsa, katta ehtimol bilan montaj texnologiyasi buzilgan. Bunday holda, kafolat xizmati doirasida nuqsonni bepul bartaraf etish uchun cho‘ziluvchan shiftni o‘rnatgan kompaniyaga murojaat qilish kerak.

«Asosiy shiftda tirqishlar va yoriqlar bo‘lishi mumkin. Bu tirqishlarni albatta yopish kerak, chunki cho‘ziluvchan shift vantuz (so‘rg‘ich) kabi ishlaydi. Eshikni ochdingiz — u „tashqariga chiqdi“, eshikni yopdingiz — u „ichkariga tortildi“», — deb tushuntiradi Runtov.

Agar muammo bir muncha vaqt o‘tgach yuzaga kelgan bo‘lsa, demak, shiftda yoriqlar paydo bo‘lgan bo‘lishi mumkin. Beton asos va cho‘ziluvchan shift yuzasi o‘rtasidagi bosim pasayganda, bunday yoriqlar mavjudligi sababli mato asosga «yopishib» qoladi. Bunday muammoni ventilyatsiya panjarasini o‘rnatish orqali hal qilish mumkin.