Nanofazo nazariyasi: kichkina oshxonaga qanday qilib hamma narsani sig'dirish mumkin

Agar saqlash uchun joy kerak bo'lsa, duxovkadan voz kechib, uni multivarka yoki mikroto'lqinli pechga almashtirish mumkin, deb davom etadi Arutyunova. Shu tariqa biz to'liq o'lchamli oshxona shkafini qo'lga kiritamiz.

Klassik ovqatlanish stolidan voz kechib, uni transformator-stolga almashtirish yoki deraza tokchasidan foydalangan holda u yerda ovqatlanish zonasi, ishchi sirt yoki rakovina o'rnatilgan funksional zona yaratish mumkin, deb maslahat beradi dizayner.

Kichik xonada, ayniqsa ham ovqat pishiriladigan, ham ovqatlaniladigan oshxonada, juda o'tkir va faol sovuq ranglar kayfiyat va hazm qilish jarayoniga salbiy ta'sir ko'rsatadi, deb tushuntiradi dizayner Yekaterina Semixatova. «Bu psixologlar tomonidan isbotlangan. Ozmoqchi bo'lsangiz, oshxonani havorang rangga bo'yang. Ishtahangiz yo'qoladi. To'g'ri, shu bilan birga kayfiyatingiz ham tushib ketishi mumkin», — deya qo'shimcha qiladi u.

Kichik oshxonada deraza tokchasi keraksiz buyumlar bilan to'lib ketmasligi kerak, deb hisoblaydi OBI ta'mirlash va bog'dorchilik gipermarketlari tarmog'i eksperti Vadim Vozniy.

«Bu yerda har bir santimetr foydali maydon oltin bahosiga teng, shuning uchun deraza tokchasidan foydalanmaslik juda isrofgarchilik bo'ladi. Kichik oshxonalar uchun eng samarali usullardan biri — stol ustini (stoleshnitsa) deraza tokchasigacha uzaytirishdir. Shu tariqa siz qo'shimcha ishchi zona yaratishingiz yoki yangi keng deraza tokchasidan stol o'rnida foydalanib, derazadan tashqaridagi manzaradan zavqlanib nonushta qilishingiz mumkin», — deydi ekspert.

Kichik oshxonalarning asosiy qoidasi — juda to'q rangli bezak va mebellardan foydalanmaslikdir, bunday tuslar kichik xonani vizual ravishda yanada toraytirib ko'rsatadi, deydi Vozniy. Och ranglarga ustunlik berish kerak, ayniqsa mebel fasadlari fartuk, pol va devorlar bilan bir xil rangda bo'lgan oshxonalar juda ta'sirli ko'rinadi. Buning sharofati bilan sig'imli shkaflar interyerda go'yo erib ketadi va makon vizual ravishda kengayadi.

Qolaversa, bu usulni o'z qo'llaringiz bilan amalga oshirish mumkin, deb davom etadi Vozniy. Agar sizda allaqachon oshxona mebeli bo'lsa, lekin uning dizayni eskirgan bo'lsa, eski garniturni tashlab yuborishga shoshilmang. Ta'mirlash jarayonida fasadlar va mebel korpuslarini devor rangiga bo'yang, mos rang va fakturadagi yangi stol ustini o'rnating hamda furnituralarni zamonaviylariga almashtiring. Yana bir variant — shakli yoqqan fasadli modulli oshxona mebelini sotib olib, uni ham fartuk va devor rangiga bo'yashdir.

Kichik oshxonada shishadan yasalgan fartuk yoki stol usti amaliy bo'lmasligi mumkin, chunki ularni toza saqlash ancha qiyin, shishada har qanday dog' va tomchilar yaqqol ko'rinib turadi, deya qo'shimcha qiladi Semixatova. Shuningdek, yuvish qiyin bo'lgan materialdan yasalgan nomutanosib katta lyustralarni osish ham ortiqchalik qiladi.

Manba: uybor.uz