Toshkentdagi yangi qurilgan uylarda ta'mirlash ishlari: asosiy bosqichlar

Hozirda Toshkentda yangi qurilgan uylarning aksariyati erkin reja (svobodnaya planirovka) asosida topshirilmoqda. Bu shuni anglatadiki, xonadon hali pardozlanmagan, ichki devorlar ham o‘rnatilmagan. Faqatgina asosiy yuk ko‘taruvchi devorlar, derazalar va barcha zarur kommunikatsiya tarmoqlari mavjud. Kelajakda uy egasi o‘zining dizayn va rejalashtirish bo‘yicha barcha talablariga to‘liq javob beradigan ta’mirni amalga oshirish imkoniyatiga ega bo‘ladi. Xo‘sh, yangi qurilgan uylarda ta’mirlash ishlarining asosiy xususiyatlari qanday va ishlarni bajarishning asosiy bosqichlari nimadan iborat?

Ta’mirlash nimadan boshlanadi?

Dastlab reja-loyiha va dizayn tuziladi. Sxematik reja xonadon nechta xonadan iborat bo‘lishini, hammom, hojatxona, kilerning joylashuvini, qo‘shimcha kommunikatsiyalarni (internet, kabel televideniyesi, signalizatsiya va h.k.) o‘tkazish joylarini aniqlashga yordam beradi. Shundan so‘ng dizayn tuzish boshlanadi: bu ishni har bir xona uchun alohida virtual model yaratadigan professional dizaynerga topshirgan ma’qul.

Dizayn to‘liq kelishib olingandan keyingina kvartirani ta’mirlash jarayoni boshlanadi. Bunda barcha ishlarni issiq mavsumda amalga oshirish maqsadga muvofiq: bu barcha bosqichlarni tezroq bajarish va ortiqcha xarajatlarning oldini olish imkonini beradi.

Ishlarni bajarish tartibi

Yangi uylarni ta’mirlashni shartli ravishda quyidagi bosqichlarga bo‘lish mumkin:

1. Ichki devorlarni qurish, xonalarni shakllantirish, shovqin izolyatsiyasini o‘rnatish.
2. Kommunikatsiya ishlari. Odatda, avval suv quvurlari, kanalizatsiya, gaz taqsimlash tugunlari, qozon (kotyol) o‘rnatish va h.k. ishlar bajariladi. Keyin esa elektr tarmoqlari va kabel tizimlari (masalan, agar iliq pol tizimi rejalashtirilgan bo‘lsa) o‘tkaziladi.
3. Pol va devorlarni tekislash. Birlamchi suvoq, styajka va boshqa ishlar.
4. Devor, shift va polni pardozlash ishlariga tayyorlash.
5. Pardozlash ishlari: pol qoplamalarini yotqizish, osma shiftlarni o‘rnatish, bo‘yash yoki oboy yopishtirish.
6. Santexnika o‘rnatish, kommunikatsiyalarni yakuniy ulash, texnika va mebellarni joylashtirish.

Ushbu ta’mirlash bosqichlari ketma-ketligi ish jarayonida xatolarga yo‘l qo‘yish xavfini minimallashtiradi. Agar har bir bosqichdan so‘ng sifat nazorati o‘tkazilsa, buyurtmachi aynan o‘zi kutgan natijaga erishadi.

Keng tarqalgan xatolar

Ta’mirlash jarayonida yo‘l qo‘yiladigan eng keng tarqalgan xatolar:

1. Ta’mirlashni juda erta boshlash. Ko‘p qavatli uy qurib bitkazilgandan keyin dastlabki 1,5 – 2 yil davomida ta’mirlash ishlarini boshlamaslik tavsiya etiladi. Chunki bu davrda uy o‘rnashadi (usadka). Aks holda, devorlarning pardoz qismida mayda yoriqlar paydo bo‘lishi mumkin.
2. Reja-loyiha va dizaynni mustaqil tuzish. Amaliyot shuni ko‘rsatadiki, yetarli tajribaga ega bo‘lmasdan qilingan ishda xatolar muqarrar. Ularni keyinchalik qayta tuzatish dastlabki ta’mirdan ko‘ra qimmatroqqa tushadi.
3. Ta’mirlash bosqichlariga rioya qilmaslik. Masalan, ko‘pincha xonadon egalari xonalarni alohida-alohida ta’mirlashadi. Bunday qilmaslik kerak, chunki sathlardagi nomutanosibliklar deyarli kafolatlangan. Ta’mirlashni butun kvartira bo‘ylab bir vaqtda olib borish kerak. Bu, ayniqsa, xonalar bo‘linmagan studiya-kvartiralarga tegishli.

Ko‘pincha Toshkentdagi yangi uylarda kvartirani qabul qilib olishda jiddiy kamchiliklar kuzatiladi. Afsuski, bunday holatlar tez-tez uchrab turadi. Shunda quruvchi tomonidan yo‘l qo‘yilgan xatolarni qayta bajarishga to‘g‘ri keladi.

Shu sababli, yangi qurilgan uydan kvartira sotib olish uchun professionallarga murojaat qilish kerak. Ular sizga ipoteka yoki bo‘lib to‘lash (ortiqcha to‘lovlar va foizlarsiz) asosida uy olishga ham yordam berishadi.

Xulosa

Erkin reja asosidagi va pardozlanmagan kvartirani sotib olishning ko‘plab afzalliklari bor. Birinchidan, bunday ko‘chmas mulk narxi tayyor kvartiralarga qaraganda ancha arzon. Ikkinchidan, bu kelajakdagi egasiga interyer dizaynini o‘zi mustaqil belgilash imkonini beradi.